MPJ greke reagon ndaj betimit të Siljanovskës: “Kursi europian varet nga përdorimi i emrit kushtetues”
Ambasadorja e Greqisë në Maqedoninë e Veriut, Sofia Filipidu, e cila ishte ftuar në seancën e Kuvendit për inaugurimin e Gordana Siljanovskës, u largua në shenjë proteste për shkak se presidentja gjatë betimit të saj vendin e quajti Maqedonia, duke e shkelur Marrëveshjen e Prespës. Ministria e Punëve të Jashtme greke ka reaguar pas betimit të sotëm të presidentes së sapozgjedhur të vendit, Gordana Siljanovska-Davkova. MPJ greke thotë se pavarësisht se në tekstin zyrtar të betimit që i është lexuar, vendi quhet “Maqedonia e Veriut”, presidentja e re ka vendosur ta quajë vendin e saj “Maqedoni”.
Sipas Ministrisë, ky akt shkel në mënyrë të rëndë Marrëveshjen e Prespës si dhe Kushtetutën e shtetit fqinj, e cila është në përputhje me detyrimet e tij ndërkombëtare. “Qeveria greke, pavarësisht kundërshtimeve që shprehu për ratifikimin e marrëveshjes, e respektoi atë si një marrëveshje ndërkombëtare të ratifikuar që ka përparësi ndaj çdo dispozite tjetër ligjore. “Greqia, në këtë kontekst, deklaron kategorikisht se përparimi i mëtejshëm në marrëdhëniet e saj dypalëshe me Maqedoninë e Veriut, si dhe kursi evropian, varet nga zbatimi i plotë i Marrëveshjes së Prespës dhe mbi të gjitha nga përdorimi i emrit kushtetues të vendit“, thuhet në reagim.
