Familje të tëra po ikin nga RMV, i ka ndalur përkohësisht vetëm pandemia

Numri i personave që largohen nga Maqedonia dhe emigrojnë po rritet. Me përjashtim të vitit pandemik 2020, kur janë dukshëm më pak të larguar, nga viti 2011 e në vazhdim numri i qytetarëve të larguar është në rritje të vazhdueshme. Të dhënat tregojnë se më së shumti nga Maqedonia largohen familjet me fëmijë nën 10 vjeç. Shifrat tregojnë se shumica e fëmijëve që largohen nga bankat e shkollës e bëjnë këtë sepse familja shpërngulet jashtë vendit. Një arsye e dytë për të lënë shkollën është regjistrimi në një shkollë tjetër në të njëjtën lagje, ose në një pjesë tjetër të vendit, shkruan PRESSonline.al

Analiza e Entit Shtetëror të Statistikave “Popullsia e Fëmijëve” tregon se nga viti në vit këto tendenca bëhen më të theksuara.

– Sipas të dhënave për fëmijët që kanë braktisur shkollën fillore dhe kanë ndërprerë shkollimin, në periudhën 2017-2022 vërehet një trend i vazhdueshëm i rritjes, nga 2,871 në 3,313, që paraqet një rritje prej rreth 15 për qind – thuhet në analizën e ESHS.

Përjashtim bën viti 2020/2021, me uljen që supozohet të jetë për shkak të ndikimit të masave kufizuese për udhëtimet jashtë vendit gjatë vitit të parë të pandemisë Covid-19.

Nga nxënësit që u larguan, rreth një e treta u transferuan në një shkollë tjetër në të njëjtin vendbanim, më pak se një e treta shkuan në një shkollë tjetër në një komunë tjetër të vendit dhe pjesa e nxënësve që lanë arsimin fillor për të vazhduar shkollimin në shtetet e tjera dominojnë.

– Pak më pak se gjysma e numrit të përgjithshëm të nxënësve kanë lënë shkollën fillore për shkak të emigrimit jashtë vendit. Kjo përqindje, me përjashtim të vitit pandemik 2019/2020, tregon një rritje të lehtë përgjatë viteve në analizë. Po ashtu, po rritet edhe përqindja e nxënësve që kanë braktisur shkollën fillore për shkak të migrimit të brendshëm – sqarohet në analizë, përcjell PRESSonline.al

Është e rëndësishme të theksohet se më shumë se gjysma, dhe në disa vite shkollore edhe afër dy të tretat e nxënësve që kanë ndërprerë arsimin fillor, e kanë bërë këtë në klasat I deri në IV; rreth 15 për qind e bënë atë në klasën e 5-të; më pak se 10 për qind në klasën VI, një përqindje pak më e lartë e largimeve ndodhin në klasat VII dhe VIII.

NJË NJË NUMËR I MADH I ADOLESHENTËVE NUK REGJISTROHEN NË ARSIM TË MESËM

Analistët theksojnë se përfundimi i parë i përgjithshëm është se numri i nxënësve në arsimin e mesëm është më i ulët se numri i nxënësve në arsimin fillor dhe se ndryshimet këtu janë më të vështira për t’u analizuar.

– Kur është fjala për shkallët e regjistrimit në arsimin e mesëm, në periudhën në analizë ato mbeten nën nivelin e regjistrimit në arsimin fillor edhe pse arsimi i mesëm është i obligueshëm në Maqedoni. Në periudhën në analizë, shkalla e përgjithshme bruto e regjistrimit të nxënësve në arsimin e mesëm sillet ndërmjet 78.9 dhe 85.6. Dallimet sipas gjinisë janë të pranishme dhe diferenca më e madhe prej 3.8 për qind është vërejtur në vitin shkollor 2016/2017, në favor të djemve. Në vitet e fundit shkollore, ky hendek është zvogëluar, me 1.3 për qind më shumë vajza se sa djem të regjistruar në vitin shkollor 2021/2022. Nëse analizojmë shkallën bruto të regjistrimit, mund të konkludohet se ajo tregon një trend në rënie; megjithatë, fakti që më shumë se 15 për qind e popullsisë nën moshën e përcaktuar me ligj nuk përfshihet në arsimin e mesëm tregon nevojën për të adresuar këtë çështje – thekson analiza, përcjell PRESSonline.al

Statisticienët tregojnë gjithashtu se ka nxënës që braktisin arsimin e mesëm, por nuk ka të dhëna se ku largohen.

Përqindja e nxënësve që kanë lënë shkollën për arsye të panjohura varion ndërmjet 9 përqind në 2021/2022, 15 përqind në 2018/2019. Përqindja e këtyre nxënësve ndryshon me kalimin e viteve dhe nuk mund të identifikohen tendenca të qarta. Kur bëhet fjalë për vitet në të cilat shkollimi i mesëm ndërpritet më shpesh, të dhënat tregojnë se kjo më së shpeshti ndodh në dy vitet e para të arsimit të mesëm.(PRESSonline.al)