CNN: Lindja e Mesme në teh pas sulmit të Izraelit ndaj Iranit, çfarë dihet deri më tani

Izraeli ka kryer një sulm brenda Iranit, tha një zyrtar amerikan për CNN të premten, në një lëvizje që kërcënon të përshkallëzojë më tej konfliktin në Lindjen e Mesme.

Sistemet e mbrojtjes ajrore të Iranit u aktivizuan në disa lokacione pasi u dëgjuan shpërthime pranë aeroportit dhe një baze ushtarake në provincën e Isfahanit, raportoi media shtetërore të premten herët në mëngjes.

Izraeli nuk e ka marrë përgjegjësinë për sulmin.

Çfarë dihet?

Çfarë thonë raportet iraniane: Tre shpërthime u dëgjuan pranë një baze ushtarake ku ndodhen avionët luftarakë në veriperëndim të Isfahanit, njoftoi agjencia gjysmë zyrtare e lajmeve FARS e Iranit. Pas sulmit, media iraniane raportoi se të gjitha objektet përreth Isfahanit janë të sigurta, duke përfshirë objektet e rëndësishme bërthamore në zonë. Zëdhënësi i Qendrës Kombëtare të Hapësirës Kibernetike të Iranit, Hossein Dalirian, tha se mbrojtja ajrore rrëzoi tre dronë dhe “nuk ka raportime për një sulm raketor tani për tani”.

Cili ishte objektivi?

Kjo mbetet e paqartë, por zyrtari amerikan i tha CNN se objektivi i sulmit nuk ishte bërthamor. Sipas FARS, një radar ushtarak ishte një objektiv i mundshëm. Ghahjaworstan, ku u dëgjua një shpërthim, ndodhet pranë aeroportit të Isfahanit dhe “bazës së tetë sulmuese të Forcave Ajrore të Ushtrisë”, raportoi FARS.

Si erdhi deri këtu?

Tensionet mbeten të mprehta në të gjithë Lindjen e Mesme ndërsa Izraeli zhvillon luftë në Gaza kundër grupit militant palestinez Hamas, një aleat iranian. Ndërkohë, një konflikt hije prej dekadash midis Izraelit dhe Iranit shpërtheu në të hapur në fundjavë kur Irani nisi një sulm të paprecedentë ndaj Izraelit që Teherani tha se ishte hakmarrje për një sulm ajror të dyshuar vdekjeprurës izraelit në konsullatën e Iranit në Siri.

Çfarë thotë Izraeli?

Ushtria izraelite tha të premten se “nuk kanë një koment në këtë moment” kur u pyet nga CNN në lidhje me raportet për shpërthime në Iran. Kabineti i luftës i Izraelit është mbledhur në mënyrë periodike këtë javë pa njoftuar ndonjë veprim përfundimtar pas sulmeve iraniane ndaj Izraelit fundjavën e kaluar.

Çfarë thotë SHBA: Aleatët e Izraelit, përfshirë Shtetet e Bashkuara, kanë bërë thirrje për përmbajtje nga Izraeli në një përpjekje për të parandaluar një luftë rajonale. SHBA “nuk ndezi dritën jeshile” një përgjigje izraelite, tha një tjetër zyrtar i lartë amerikan për CNN. Përpara sulmit të së premtes, pritshmëria e SHBA ishte që Izraeli të mos synonte objektet civile ose bërthamore, tha zyrtari i dytë.

Çfarë ndodh më pas? Edhe kjo mbetet e paqartë. Raportet për shpërthimet erdhën disa orë pasi Ministri i Jashtëm i Iranit, Hossein Amir-Abdollahian i tha CNN se nëse Izraeli ndërmerr ndonjë veprim të mëtejshëm ushtarak kundër Iranit, përgjigja e tij do të ishte “e menjëhershme dhe në një nivel maksimal”.

Ai shtoi: “Nëse regjimi izraelit kryen edhe një herë gabimin e rëndë, përgjigja jonë do të jetë vendimtare, përfundimtare dhe për të ardhur keq”.