Yulia Navalnaya i drejtohet rusëve: Dilni në protestë ditën e zgjedhjeve, prishni fletën e votimit!

Yulia Navalnaya, e veja e liderit të ndjerë të opozitës, Alexei Navalny, u bëri thirrje rusëve që t’i bashkohen një proteste të ditës së zgjedhjeve në mesditën e 17 marsit dhe të votojnë kundër Presidentit Vladimir Putin ose të prishin fletëvotimet e tyre.

Me anë të një videoje në YouTube, Navalnaya tha se kishte shpresë nga turmat e mëdha që dolën javën e kaluar për funeralin e burrit të saj, i cili vdiq në një koloni penale të Arktikut më 16 shkurt.

Ideja e Navalny ishte që njerëzit të mund të ngrihen në një protestë, pa asnjë rrezik arrestimi, duke dalë të gjithë masivisht në të njëjtën kohë në ditën e zgjedhjeve në qytetet anembanë vendit.

“Duhet të përdorim ditën e zgjedhjeve për të treguar se ne ekzistojmë dhe jemi shumë prej nesh. Ne jemi njerëz të vërtetë, të gjallë dhe jemi kundër Putinit. Ju duhet të vini në qendrën e votimit në të njëjtën ditë dhe në të njëjtën kohë, 17 mars në mesditë. Çfarë të bëni më pas? Zgjedhja është e juaja. Ju mund të votoni për çdo kandidat përveç Putinit. Mund të prishni fletën e votimit, mund të shkruani “Navalny” me shkronja të mëdha mbi të. Dhe edhe nëse nuk e shihni kuptimin në votim, fare thjesht mund të vini dhe të qëndroni në qendrën e votimit, dhe pastaj të ktheheni dhe të shkoni në shtëpi”, tha Yulia Navalnaya.

Që nga vdekja e bashkëshortit të saj, Navalnaya ka premtuar të vazhdojë punën e tij dhe ka bërë disa paraqitje politike të profilit të lartë në Perëndim, duke përfshirë takimin me Presidentin e SHBA Joe Biden dhe fjalimin në Konferencën e Sigurisë së Mynihut dhe Parlamentin Evropian.