Sela: Dua që Aleanca të shkojë e vetme në zgjedhje, por vendos Kuvendi Qendror

Aleanca për Shqiptarët ka kapacitet të shkojë e vetme në zgjedhje dhe të jetë konkurruese me BDI-në për të fituar – thotë deputeti dhe kryetari i Kuvendit Qendror të AA-së, Zijadin Sela, në një intervistë për “360 gradë” në RTM 1, duke përsëritur qëndrimin që lideri i partisë Arben Taravari ka deklaruar gjatë kësaj periudhe, se ka një vendim të Kryesisë Qendrore që thotë se Aleanca për Shqiptarët do të shkojë e vetme në zgjedhjet e rregullta parlamentare.

“Unë kam qenë ndjekës i kësaj ideje dhe vazhdoj të jem, por ka kohë në lidhje me marrjen e një vendimi nëse do të shkojmë, në çfarë forme do të dalim në zgjedhje…”, ka thënë Sela.

Nëse ka mundësi për koalicion me BDI-në, Sela ka thënë :

“E thashë pak kohë më parë, ka një vendim të Kryesisë Qendrore. Një tjetër autoritet më i lartë brenda Aleancës që mund të marrë një vendim të ndryshëm nga vendimi i Kryesisë Qendrore është vetëm Kuvendi Qendror i partisë, i cili duhet të mbahet nga Statuti, periudhën kur do të mbahet do ta vlerësojmë ne”.

Për variantin për një front edhe më të gjerë parazgjedhor në të cilin LSDM do të ishte me partnerët e saj, BDI-në dhe Aleancën për Shqiptarët, Zijadin Sela thotë se ai personalisht nuk është ithtar i kësaj ideje.

“Fola për një vendim që është marrë dhe për qëndrimet që kam pasur në atë mbledhje të Kryesisë Qendrore, ndërsa personalisht nuk mendoj se kjo do të sjellë të mira në skenën politike në Maqedoninë e Veriut sepse do të ishte një nxitje për të bërë zgjedhjet bipolare, mund të perceptohen si një garë mes shqiptarëve dhe maqedonasve me kusht, ku VMRO-ja mund ta përdorte këtë element për të nxitur më shumë ndarje të tilla. Ideja për një front të tillë që kam dëgjuar është një ide për përshpejtimin e procesit të integrimit në BE dhe quhet fronti europian, por unë personalisht nuk jam ndjekës i kësaj ideje”, thotë kryetari i Kuvendit Qendror të Aleancës për Shqiptarët Zijadin Sela.