Kurti: Radoiçiq po përgatit sulme të reja ndaj Kosovës, por ne jemi gati

Kryeministri i Kosovës, Albin Kurti në një konferencë për media ka dhënë detaje të reja mbi sulmin terrorist që ndodhi në Banjskë, ku u vra rreshteri Afrim Bunjaku.

Kurti ka thënë se një muaj para sulmit terrorist, i gjithë arsenali i armatimit ka qenë i vendosur në një kompani, që ishte vizituar më parë edhe nga presidenti serb, transmeton Telegrafi.

“Arsenali që u përdorë në Banjskë, kjo kompani e cila është në listën e sankisonuar të SHBA. Pronë e Milan Radoiciq, drejtor një ish-kolonel i pensionuar serb. Ka marrë pjesë në luftërat në Bosnjë. Këtë kompani e kishte vizituar presidenti serb, Aleksandar Vuciq”, tha ai.

Kryeministri tha se Radoiciq po përgatit sulme të reja ndaj Kosovës.

“Po vazhdon përgatitjet për sulme të reja ndaj Kosovës, po mban takime sekrete në BIA. Paguhen nga dy mijë euro, ata po strehohen në objektet e tij”.

Kurti: S’dua luftë, s’dua t’iu bartet gjeneratave të reja, lë të kryhet kjo punë me mua, Xhelalin dhe Vuçiqin

Kryeministri Albin Kurti është pyetur në konferencë për media se çfarë është duke bërë Kosova për t’i ruajtur kufijtë pas alarmimeve të bëra se Radojiçiq po përgatit sulme të reja në Kosovë. Kurti ka thënë se Policia e Kosovës është duke patrulluar bashkë me KFOR-in dhe sipas Kurtit kjo ka bërë që të zmbrapsen nga planet për sulm të radhës në Kosovë, shkruan Gazeta Express.

Ai ka falënderuar edhe AKI-në duke thënë se është duke treguar një sukses të jashtëzakonshëm dhe ka potencuar se kur AKI-së i shtohet edhe bashkëpunimi me aleatët, atëherë sipas Kurtit, Kosova është e gatshme për t’i zmbrapsur suksesshëm kushdo që mendon të sulmojë Kosovën, shkruan Express.

“Kufiri me Serbinë është më i gjati 381 kilometra. Është edhe terren kodrinoro-malor. Ajo që po bëjmë ne e që duket se i ka zmbrapsur planet për sulm, është patrullimi i përbashkët me KFOR-in. Në anën tjetër kemi një inteligjencë shumë të suksesshme të Kosovës. Është e paparë puna e AKI-së në kuptimin e dyfishtë të fjalës. Këso rezultatesh janë të papara në historikun e AKI-së, për çka i falënderoj shumë AKI dhe drejtorin. Kur Kësaj i shtohet edhe koordinimi me aleatët, ne jemi të përgatitur që ti zmbrapsim suksesshëm çfarëdo sulmi që mund ta mendoj çdo kush”, ka thënë Kurti.

Kryeministri tutje ka thënë se Beogradi po dëshiron qartazi që t’ua bartë konfliktin gjeneratave të reja në Serbi. Kurti ka thënë se si politikan nuk dëshiron që konflikti të bartet të brezat e ri duke potencuar se dëshiron që konflikti “të kryhet me Xhelalin dhe mua”

“Barrikadat vitin e kaluar dolën të ishin kot, edhe këto sulme dëme të përkohshme por kot. Lënduan ushtarët e KFOR-it, vranë Afrim Bunjakun, u vranë 3 serb të grupit të Radojicict, dy prej tyre kanë qenë fëmijë në kohë të luftës në Kosovë 98-99, sepse për mua është e qartë që dikush në Beograd dëshiron që konflikti të iu mbetet gjeneratave të ardhshme. Unë jam një politikan që dëshiroj të mos ketë luftë më dhe ju brezat e ri të mos e merrni vesh kurrë cka është lufta. Le të kryhet kjo punë me Xhelalin edhe me mu. Le të kryhet me brezin tonë. Le të kryhet edhe me brezin e Vucicit. Por mos të bartet lufta, gjakderdhja tek brezi i ri. Tash me këta terroristë që u vranë, ka një cytje e orkestrim që konflikti të bartet tek brezi i ardhshëm. Kjo është brengosëse për mua në aspektin socio-historik. Sepse nëse vdesin brezat e rinj pa e ditur çfarë ka ndodhur më 1999, është përgatitje për brezat e ardhshëm që të përjetojnë tragjeditë që i kemi pasur edhe ne. Duhet të ndërpritet kjo. Duhet të përgatitemi për integrime dhe të orientohemi kah normalizimi i raporteve. Ky është synimi ynë, por s’është kollaj sepse po përballemi me një Serbi agresive dhe armiqësore”, ka thënë Kurti./Express/

Kurti alarmoi për sulme të reja, KFOR tregon si ushtarët amerikanë po patrullojnë për siguri afër Leposaviqit

Pak minuta pasi kryeministri Albin Kurti ka përfunduar konferencën e tij ku ka alarmuar se në Serbi po përgatiten sulme të reja kundër Kosovës, misioni i KFOR-it në Kosovë ka publikuar fotografi të ushtarëve amerikanë duke patrulluar në afërsi të Lepsoaviqit, shkruan Gazeta Express.

Këto janë patrullime të sigurisë të bëra nga amerikanët që janë në kuadër të Komandës Rajonale Lindore të KFOR-it,.

KFOR tutje ka theksuar se është e fokusuar plotësisht në implementimin ditor të mandatit të saj bazuar në Rezolutën 1244 për të ofruar një ambient të qetë dhe të sigurt për të gjithë ata që jetojnë në Kosovë.

“Ushtarët amerikanë të caktuar në Komandën Rajonale të KFOR-it në Lindje (RC-E) kryen një patrullë sigurie në afërsi të Leposaviqit.KFOR-i është plotësisht i fokusuar në zbatimin e përditshëm të mandatit të tij – bazuar në Rezolutën 1244 të Këshillit të Sigurimit të OKB-së të vitit 1999 – për të ofruar një mjedis të sigurt dhe të sigurt për të gjitha komunitetet që jetojnë në #Kosovë dhe lirinë e lëvizjes”, ka shkruar KFOR./GazteaExpress/