Ja çka mund ta shpëtojë Palevskin nga ekstradimi sipas Nikollovskës!

Procedura e ekstradimit nga Turqia nuk mund të përfundojë brenda një ose dy ditësh, shpjegon ish-gjyqtarja e Strasburgut Margarita Caca Nikollovska. Ajo thotë se tani hapi i parë është që autoritetet turke të përgjigjen, nëse kolegët nga Maqedonia kanë dërguar dokumentacionin e plotë të ekstradimit të të dyshuarit për vrasjet, Lupço Palevski Palço. Sipas Nikollovskës, vetëm atëherë do të fillojë faza e vendimmarrjes. Megjithatë, siç shton ajo autoritetet turke pritet të marrin parasysh faktin se rasti ka shkaktuar shqetësime serioze publike në vendin tonë. Në të njëjtën kohë, u bën thirrje politikanëve të përmbahen nga një sërë deklaratash në lidhje me veprën, pasi politizimi mund të çojë në refuzimin e ekstradimit.

“Rastet botërore të ekstradimeve që njihen, kur ato nuk janë mundësuar në një mënyrë të caktuar, për shkak të paaftësisë së caktuar për të kryer një procedurë të drejtë, ose për shkak të politizimit të rasteve. Por shpresoj se kjo nuk do të ndodhë në vendin tonë, dhe të gjithë politikanët duhet të jenë të vetëdijshëm të përmbahen nga deklarata të tilla, në mënyrë që të mos vijmë në një situatë të mos- ekstradimit”, deklaroi Margarita Caca Nikolovska – ish-gjyqtare.

Caca Nikollovska beson, të paktën nga ajo që ndahet në publik, se policia dhe autoritetet gjyqësore po bëjnë punën e tyre, në mënyrë të shpejtë për momentin në rastin e vrasjeve të 14-vjeçares Vanja Gjorçevska dhe Pançe Zhezovskit nga Velesi.

“Nuk mund të them nëse ka pasur ndonjë lëshim, por një gjë dua të theksoj, se shërbimet nuk kanë qenë në gjendje të paraqesin gjithçka në publik. Prezantimi ishte selektiv për sa i përket asaj që këto shërbime mund të informonin publikun për situatën, duke marrë parasysh jo vetëm ndjeshmërinë e çështjes, por edhe veprimin e mëtejshëm dhe marrjen e informacioneve të caktuara, që do të jenë relevante për procedurën nesër dhe pasnesër”, shtoi Margarita Caca Nikolovska – ish-gjyqtare.

Megjithëse ekspertët bëjnë thirrje që rasti të mos përdoret për qëllime politike, VMRO-DPMNE dhe LSDM akuzojnë njëra-tjetrën se kanë lidhje me të dyshuarin kryesor Palevski.

“Strukturat politike dhe policore të LSD-së mbrojtën dhe mbyllën sytë ndaj sjelljes së Lupço Palevski Pallços, sepse u përshtatej atyre. Nëpërmjet podkasteve dhe transmetimeve në portale, përhapte urrejtje dhe krijonte atmosferë toksike. Qeveria e inkurajoi atë të fyente, shpifte, kërcënonte dhe kur Palevski ndihej mjaft i paprekshëm, ai kaloi në reket, shantazh dhe përfundoi me një vrasje tragjike të dyfishtë”, deklaruan nga VMRO-DPMNE.

“Hristijan Mickoski nuk duhet të heshtë për takimin me Palevskin, por duhet të përgjigjet. Nëse Mickoski vërtet ka informacione të ndryshme në lidhje me rastin e vrasjes së dyfishtë, ai duhet ta paraqesë në Prokurorinë Publike. Fshehja e provave është vepër penale. Palevski, i cili dyshohet për vrasjen e dyfishtë që tronditi të gjithë publikun, ishte një bashkëpunëtor i ngushtë i regjimit të DPMNE-së dhe mbështeti publikisht Mickoskin, por edhe partnerin e tyre të koalicionit Levica”, thanë nga LSDM.

Ndërkohë, ndërsa Palevski pritet të ekstradohet, tre shokët e tij nga partia “Desna”, janë tashmë në Shutkë, të cilët dyshohen se janë bashkë-ekzekutorë në rrëmbim. Babai i Vanjës, si dhe personi që e transportoi atë nga Beogradi në Turqi, janë në paraburgim 30-ditorë. Megjithëse përsëri u thirr për t’u marrë në pyetje, për avokatin e Palevskit që e çoi nga Shkupi në Beograd, Prokuroria tha se nuk kishte arsye për ndalimin e tij, por se përfshirja e tij e mundshme vazhdonte të hetohej. /Alsat.mk