Mungesa e transportit lë nxënësit e Bllacës pa mësim

Mungesa e transportit lë nxënësit e Bllacës pa mësim

Mungesa e transportit të rregullt publik në fshatin Bllacë po lë pa mësim nxënësit, të cilët mësojnë në shkollat e mesme të Shkupit, shkruan Alsat.

Në mungesë të autobusit të linjës 81 nxënësit thanë se po humbin orë dhe ditë të tëra nga procesi mësimor duke krijuar mungesa të panumërta.

Pas shtatë orëve mësim, nxënësit mbeten rrugëve edhe për katër orë të tjera në pritje të autobusit për në Bllacë.

“Gati një orë e gjysmë po pres këtu autobusin mirëpo nuk erdh, tash është ora një e gjysmë edhe unë nuk jam në orë të mësimit e pranishme për shkak të mungesës së autobusit. Ka ditë që mungon tërë ditën edhe nuk kam me çka të shkoj në shkollë. Mundohen të na arsyetojnë mungesat, po mundohemi të shkojmë me vetura me prindërit, me gjet ndonjë zgjidhje çdo ditë”, tha një nxënëse.

“Kur jemi paradite në shkollë, kur mbarojmë në ora 13 bredhim rrugëve dhe nuk kemi me çka të shkojmë, deri në 16 e 50 duhet me prit që të vij autobusi tjetër të na dërgojë në Bllacë. Në vend që të shfrytëzojmë katër orë për mësim duhet të qëndrojmë rrugëve”, theksoi një nxënës.

Transporti jo i rregullt drejt Bllacës ka ndikuar edhe në suksesin e nxënësve. Thonë se orët e humbura mundohen t’i kompensojnë duke huazuar mësimet prej shokëve.

“Çdo ditë i humbim orët, nga dy orë po i humbim. Qysh po e kompensoni orën që po e humbni? Patjetër me marr prej një shoqes ose prej dikujt me i fotografu, me i marr. Katër orë mbesim në rrugë. Çka bëni në atë kohë, ku qëndroni. Patjetër në rrugë të qëndrojmë, me ec lart poshtë”, u shpreh një nxënëse.

Pjesa më e madhe e nxënësve të Bllacës mësojnë në gjimnazin “Zef Lush Marku” në Shkup. Mësimdhënësi, Faruk Rexhepi tha për Alsat se situata po ndikon negativisht në psikologjinë dhe zhvillimin e nxënësve.

“Nxënësi para se me ardh në shkollë ka një numër të gjatë pasojash e problemesh derisa ai mbërrin këtu. Edhe nëse i ka mësuar të gjitha mësimet psikologjikisht nuk është i përgatitur sepse nuk ka transport, nuk ka se si vjen, na vonohen nxënësit në përgjithësi. Ne e dimë që atij i është vonuar autobusi, e dimë dhe jemi të sigurt që është vonuar por është problem që edhe mungesat të arsyetohen sepse nesër të gjithëve mund tu vonohet autobusi, ndoshta”, tha Faruk Rexhepi, mësimdhënës.

Sipas Rexhepit, rreth 30 nxënës të fshatit Bllacë ndjekin mësimin në shkollat e mesme të Shkupit, nga viti i parë deri atë të katërt. Për këtë problematikë sqarim kërkuam nga Ndërmarrja e Qarkullimit Publik, por thanë se për këtë temë do të përgjigjen javën që vjen.