Stuhia ‘Ciaran”, 14 të vdekur në Evropën Perëndimore
Zyrtarët në Evropën Perëndimore thanë se stuhia ‘Ciaran’ shkaktoi vdekjen e të paktën 14 personave gjatë tre ditëve të fundit, duke sjellë me vete erëra me shpejtësi rekord, shi të dendur, breshër dhe ndoshta një tornado.
Zyrtarët në rajonin e Toskanës në Itali, shpallën gjendjen e jashtëzakonshme mes problemeve të mëdha të shkaktuara nga stuhia si pemë të rrëzuara e rrugë të përmbytura. Gati 200 milimetra shi u njoftuan se kishte rënë në bregdetin veriperëndimor.
Guvernatori i Toskanës Eugenio Giani shkruante në platformën X se gjashtë persona kishin humbur jetën si pasojë e stuhisë, mes tyre dhe një burrë 85-vjeçar që u mbyt në katin e poshtëm të shtëpisë së tij pranë Pratos, në veri të Firences.
Mediat njoftuan për erëra të forta në Francë, Belgjikë, Spanjë, Holandë dhe Gjermani, që u bënë shkak për vdekjen e disa personave.
Zyra britanike meteorologjike njoftoi se stuhia solli breshër në madhësinë e një topi tenisi në ishullin Jersey, e me gjasë shkaktoi një tornado të rrallë për rajonin.
E njëjta zyrë tha se stuhia vendosi një rekord për sa i takon presionin më të ulët barometrik të regjistruar në muajin nëntor. Meteorologët thonë se sa më i ulët të jetë presioni, aq më e fortë është stuhia.
