Lloga ka kërkuar me kohë nga Këshilli Gjyqësor dhe Këshilli i Prokurorëve të mos lejojnë vjetrimin e lëndës së Mijallkovit (Dokument)

Ministri i drejtësisë, Krenar Lloga menjëherë sapo ka marë detyrë e Ministrit të Drejtësisë, i ka shkruar Këshillit Gjyqësor, Këshillit të Prokurorëve Publikë dhe Prokurorisë Publike më 14 mars 2023, ku paralajmëroi dhe kërkoi të ndërmerren masa më efektive dhe në kohë për të parandaluar situata të tilla dhe të ngjashme të vjetërsimit të lëndëve gjyqësore përmes zvarritjes së proceseve gjyqësore. Për fat të keq ky paralajmërim nuk është marë parasysh dhe sot ndodhi edhe një vjetrim i rastit gjyqësor ndaj ish drejtorit të DSK-së, Sasho Mijallkov.

Lloga ka reaguar me revoltë të theksuar ndaj kësaj.

“Më vjen keq që u lejua të përfundonte një rast tjetër, “Titanik 2” dhe atë për të njëjtin të pandehur. Pavarësisht zotimit tim për të mos ndërhyrë në pavarësinë e gjyqësorit, jam i detyruar të reagoj, t’u bëj thirrje të gjitha institucioneve dhe organizatave që urgjentisht të marrin masa për reforma të shpejta”, thotë ministri Lloga, shkruan Lideri.mk.

Porosia e tij është se raste të tilla nuk kontribuojnë në zhvillimin e shoqërisë, por përkundrazi, me dëmet që do të shkaktojnë edhe më shumë do të cenojnë besimin e qytetarëve në të gjithë sistemin.