Mbi 100 mijë rus janë vrarë në Ukrainë, më shumë se 4300 të gatshëm të dorëzohen

Sipas operatorit të qendrës së thirrjes ‘Dua të jetoj’ në Ukrainë, mbi 4300 ushtarë rus në front kanë kontaktuar me ta për t’u dorëzuar. Beteja më e rëndë po zhvillohet në frontin lindor për rajonin e Donbas dhe humbjet janë shumë të rënda për rusët.

Zëdhënësi i këtij projekti Vitaly Matvienko ka deklaruar se tashmë kanë një numër të konsiderueshëm të ushtarëve rus që duan të dorëzohen.

Ai ka shtuar se rastet e këtyre mbi 4300 ushtarëve rus që janë paraqitur po trajtohen me kujdes që t’iu mundësohet dorëzim i sigurt, kur dihet brutaliteti rus edhe ndaj ushtarëve të tyre.

Sipas raporteve beteja në frontin lindor të Ukrainës ka qenë jashtëzakonisht brutale në qytetin e Bakhmut dhe në betejën për autostradën Svatove dhe Kreminna në Donbas. Kjo vijë e frontit po mbrohet nga sulmet e furishme ukrainase me këmbëngulje prej ushtrisë ruse, pasi humbja e kontrollit të kësaj autostrade i detyron rusët të tërhiqen mbrapsht 30 kilometra, e që do të ishte edhe një humbje turpshme për ta. Poashtu do të rrezikoheshin edhe qytetet e pushtuara me shumë humbje nga rusët këtë verë, Lysychansk dhe Severodonetsk.

Në Bakhmut ku operon kompania mercenare ruse Wagner, e njohur për mizorinë e saj dhe më në veri, Svatove dhe Kreminna, është raportuar për raste të brutalitetit të jashtëzakonshëm të oficerëve rus ndaj ushtarëve të tyre duke i detyruar të hedhen në sulm të pakuptimtë nën kërcënimin e vrasjes si dezertorë në rast të tërheqjes.

Sipas raporteve të parët që hidhen në front janë të mobilizuarit rishtas, të papërvojë të pajisur keq, e pas tyre vijnë njësitet profesionale të ushtrisë ruse të gatshëm e të urdhëruar për të qëlluar mbi bashkëluftëtarët e tyre në rast se tërhiqen.