Interesim i lartë për vaksinim në Tetovë, qytetarët ankohen për pritje të gjata

Është mbyllur pika më e madhe e vaksinimit në Tetovë, ndërsa imunizimi vazhdon në tre pikat e tjera edhe atë në fshatin Poroj, te Shtëpia e Kulturës dhe tek Muzeu i Qytetit. Nëpër qendrat e vaksinimit sërish është vërejtur interesim i lartë për vaksinim. Pritjet kanë shkaktuar nervozizëm të qytetarët.

“Aspak rend nuk ka, çfarë rendi flet, në 9 e 30 duhej dhjetë ora është bë. Vjen motra nga brenda e merr njeriun e fut brenda pa rend. Këtu ka që presin nga ora shtatë ajo vjen dhe futet pa rend. Të njëjtën gjë e bëjnë edhe policët”.

“E dimë më e kemi parasysh, vendi jonë ashtu e ka, nuk ka rend, mungon rend mbajtja po do ja dalim, s`kemi qare”.

“Ka gjysmë ore që pres, po sistemi diçka është vonuar dhe terminët po ashtu, s`kanë faj as ata as ne”.

Fajin për pritjet, mjekët ia hedhin sistemit kompjuterik i cili shpesh bie, por edhe mos respektimit të orareve nga qytetarët.

Duhet cekur mos respektimi i orareve të caktuara paraprakisht. Tubohen gjithë qytetarët dhe pa respektuar terminin tubohen gjithë që të kryejnë punë dhe siç e shihni tubohen diku 30 – 50 qytetarë, pa respektuar kohën e dozës së dytë. Shpesh kemi probleme edhe me sistemin qendror. Disa herë brenda ditës bie sistemi, por edhe pse teknikët mundohen ta rregullojnë, kur është problemi qendror në Shkup atëherë kemi më shumë ngadalësim të procesit – tha Besnik Mustafai, mjek.

Ndërkohë situata në spitalin e Tetovës, paraqitet më e qetë se javë më parë. Nga 91 pacientët e shtruar, 90 prej tyre janë në terapi oksigjeni. Në 24 orët e fundit, në spitalin e Tetovës kanë nderuar jetë 6 pacientë./Alsat