Zyrtare: Albin Kurti e Vjosa Osmani, prishin koalicionin në Ferizaj

Balton Dërguti, përfaqësues i Listës Guxo në Ferizaj ka thënë sot se kjo iniciativë do të kandidojë me listë të veten për asamble.

Ai ka thënë se nuk do të garojnë me VV-në në një listë të përbashkët për këtë komunë.

Ndër të tjera, Dërguti deklaroi se u është premtuar se Lista “Guxo” do të krijonte strukturat e veta, pas zgjedhjeve nacionale të 14 shkurtit, por se një gjë e tillë nuk ka ndodhur ende.

“Siç e dini në zgjedhjet nacionale ne kemi garuar në një listë me VV-në sepse ishte një kohë e shkurtë dhe nuk kishim kohë për të krijuar subjektivitetin e partisë sonë. Kështu të gjithë anëtarët e Listës Guxo u futën në listat e VV-së. Na u premtua se menjëherë pas zgjedhjeve nacionale do të mbahen takime për krijimin e degëve dhe strukturave të partisë”, ka thënë ai.

Dërguti theksoi se tashmë kanë kaluar katër muaj qysh nga mbajtja e zgjedhjeve nacionale dhe se nuk është marrë ende asnjë vendim për krijimin e strukturave të iniciativës “Guxo”.

“Janë bërë më shumë se katër muaj dhe përveç deklarimeve publike se Lista Guxo nuk do të shkrihet në VV, nuk e dimë pse deri më tani nuk është marrë asnjë hap për krijimin e subjektivitetit të partisë sonë. Kjo kërkesë nuk është vetëm në Ferizaj por edhe në vendet tjera. Pritjes në Ferizaj i ka ardhur fundi dhe e dimë që që vetëm deri më datë 15 kemi kohë për aplikim. Për zgjedhjet në asamble ne do të garojmë si asamblistë të Listës Guxo, teksa e kemi lënë të hapur mundësinë nëse do të garojmë me një kandidatë për kryetar të komunës”, deklaroi ai.

“Ne po dojmë që listën për asamble ta kemi të veçantë, që të kemi një identitet tonë dhe që emrat e listës të vendoset edhe emri “guxo”. Ne nuk po bëjmë ndarje me Vetëvendosjen por vetëm po duam që të kemi kandidatët tonë për asamble”, ka thënë Dërguti.

Ndër të tjera ai në “Frontal” konfirmoi se për këtë çështje kanë kontaktuar edhe me ushtruesen e detyrës së kryetares së Listës “Guxo”, Donika Gërvalla.

“Ne jemi dakorduar që znj. Gërvalla të jetë për momentin ushtruese e detyrës së kryetares së listës. Zëvendësimi më i mirë ka qenë që të jetë Donika Gërvalla. Ne e njohim Donikën dhe e respektojmë maksimalisht. Ne një takim me znj.Gërvalla dhe z.Faton Peci ia kemi shfaqur që ne nuk kemi gatishmëri që të hyjmë në një listë me LVV-në. at ana thanë që do ta mbajmë një takim ku do të vendoset se si do të shkohet në zgjedhje, por ky takim ende nuk është mbajtur”, ka thënë ai.