Autoritetet greke janë alarmuar për zhdukjen e Artiola Mesi, një vajze 23-vjeçare me origjinë shqiptare, e cila banonte në zonën e Harilaou në Selanik. Sipas një njoftimi të lëshuar më 9 shtator 2024, Artiola Mesi është raportuar e zhdukur që nga orët e pasdites së ditës së djeshme nga banesa e saj.
Njoftimi është bërë me kërkesë të familjes së saj, që ka shprehur shqetësim se ka arsye që e vënë në rrezik jetën e saj. Artiola Mesi është përshkruar si një vajzë me gjatësi 1.60 m, me peshë normale, flokë të zinj dhe sy të gjelbër. Ajo kishte veshur një bluzë rozë dhe pantallona të shkurtra xhins në momentin e zhdukjes. Gjithashtu, ajo ka një tatuazh në krahun e majtë, një flutur.
Autoritetet greke kanë kërkuar ndihmën e qytetarëve për të ndihmuar në gjetjen e Artiolës. Kushdo që ka ndonjë informacion në lidhje me zhdukjen e saj është i lutur të kontaktojë:
Të gjitha Drejtoritë e Policisë në vend.
“Buzëqeshja e Fëmijës” në telefon 24 orë në ditë.
“Linjën Kombëtare për të Rriturit e Humbur – 1017”.
Aplikacionin Missing Alert, ku janë ofruar informacione të drejtpërdrejta për zhdukjen.
Autoritetet dhe familja e Artiolës janë të shqetësuar për sigurinë e saj dhe kërkojnë ndihmën e publikut për të siguruar rikthimin e saj të sigurtë.
