Procedurë hetimore ndaj një 33-vjeçari nga Maqedonia, për vrasjen e Orhan Bajramit në Greqi

Prokuroria Themelore Publike Shkup ka nxjerrë urdhëresë për zhvillimin e procedurës hetuese kundër një personi për vepër penale e cila në Kodin penal të Maqedonisë është paraparë si – Vrasje nga neni 123 paragrafi 2 pika 3 lidhur me paragrafin 1 dhe nenin 22, si dhe për prodhim, posedim, ndërmjetësim dhe tregtim të paautorizuar të armëve dhe lëndëve shpërthyese nga neni 396 paragrafi 3.

–

I dyshuari 33-vjeçar dhe më 15 korrik 2023, në Hanioti të Republikës së Greqisë, së bashku me një person tjetër të panjohur për momentin, me dashje i kanë marrë jetën tashmë të ndjerit Orhan Bajrami dhe ka rrezikuar jetën e katër personave të tjerë.

Pas një marrëveshjeje të mëparshme, i dyshuari dhe bashkëkryerësi i tij kanë mbërritur në kompleksin turistik ku po qëndronte viktima i maskuar dhe i janë afruar derës së hapur të ballkonit të pasmë.

I dyshuari ka shtënë 11 plumba nga arma e zjarrit – pistoletë 7.65 mm me silenciator, ndërsa bashkëpunëtori i tij me një pistoletë të kalibrit të njëjtë ka shtënë edhe 8 plumba në drejtim të viktimës. Nga plumbat, tre kanë përfunduar në trupin e tani të ndjerit, duke i shkaktuar plagë vdekjeprurëse.

Autoritetet hetimore greke kishin lëshuar një urdhër arresti për të dyshuarin, një urdhër arresti evropian dhe një urdhër arresti ndërkombëtar për dyshimin e veprave penale – Vrasje me dashje me bashkëpunim dhe Vrasje me dashje serike dhe në bashkëpunim në territorin e Republikës së Greqisë. Duke qenë se bëhet fjalë për një shtetas të Maqedonisë për të cilin nuk ka mundësi për ekstradim, në bazë të instrumenteve për bashkëpunim juridik ndërkombëtar, autoritetet greke ndjekjen penale e kanë transferuar në Prokurorinë Themelore Publike Shkup.

Prokurori publik në Gjykatën Themelore Penale në Shkup ka dorëzuar propozim për caktimin e masës së paraburgimit ndaj të dyshuarit.