Njësiti “Tigrat” vetëm me maqedonas dhe serbë, vazhdon të mbetet i mbyllur për shqiptarët

42 vjet pas themelimit, Njësitit special anti-terrorist i policisë “Tigrat”, vazhdon të mbetet pa asnjë polic shqiptar. Partitë shqiptare në pushtet heshtin për këtë fakt, ndërsa funksionarët thonë se deri më tani asnjë kandidat nuk ka kaluar të gjitha nivelet testet fizike. Në prononcimin e fundit, ministri i brendshëm Oliver Spasovski, në emisionin rruga drejt në Alsat, deklaroi se në konkursin e fundit të vitit të kaluar, ka pasur një kandidat shqiptar i cili nuk ka kaluar pasi nuk ka ditur të notojë.

“Kemi, çdo vit hapim shpallje të tillë, do u tregoj për shembull për shpalljen e fundit që u publikua vitin e kaluar nga NJS “Tigër”. Nga të gjithë kandidatët që u paraqitën të jenë pjesë e NJS “Tigër” kishte një të nacionalitetit shqiptar, i cili i filloi kontrollet dhe erdhi deri në momentin e kontrolleve preliminare, por pasi nuk dinte not nuk mund të vazhdonte më tej”, deklaroi Oliver Spasovski, ministër i Punëve të Brendshme.

Spasovski theksoi se në këtë njësi elitare nuk është me rëndësi përkatësia e etnike e policëve por përgatitja e tyre. Në ceremoninë e sotme në të cilën u shënua 42 vjetori i themelimit të “Tigrave”, nuk mori pjesë asnjë nga funksionarët e lartë politik shqiptar. I pranishëm ishte vetëm zv/drejtori i Agjencisë për siguri kombëtare Arif Asani. Në ceremoni, përveç Komandantit të njësisë, Dragan Pokopovski, folën edhe Kryeministri Dimitar Kovaçevski si dhe ministri i brendshëm, Oliver Spasovski.

Burime shqiptare në MPB thotë se në këtë njësist shumica absolute janë maqedonas, por ka edhe numër të konsiderueshëm të policëve të etnisë serbe. Nuk kanë informacion nëse ka turq, romë, boshnjakë ose vllehë.