Maqedonia e Veriut i bashkohet sistemit të BE-së për certifikatat COVID-19

Personat që posedojnë certifikatën COVID-19 të lëshuar nga këto tre vende nga nesër do të lejohen të udhëtojnë në bllokun evropian me të njëjtat kushte si qytetarët e BE-së

Bruksel

Komisioni Evropian ka bërë të ditur se Bashkimi Evropian (BE) nga 20 gushti do të pranojë certifikatat e vaksinimit kundër koronavirusit të ri (COVID-19) të Maqedonisë së Veriut, transmeton Anadolu Agency (AA).

Organi ekzekutiv i BE-së miratoi vendime ekuivalente për certifikatat COVID-19 të lëshuara nga autoritetet e Maqedonisë së Veriut, Turqisë dhe Ukrainës.

Me këtë vendim, të tre vendet bashkohen me sistemin COVID-19 të bllokut evropian duke siguruar udhëtimin e lirë drejt dhe brenda bllokut.

Personat që posedojnë certifikatën COVID-19 të lëshuar nga këto tre vende nga nesër do të lejohen të udhëtojnë në bllokun evropian me të njëjtat kushte si qytetarët e BE-së.

Në këmbim, qytetarët e BE-së do të mund të përdorin kartat e tyre COVID-19 kur do të hyjnë në Maqedoninë e Veriut, Turqi apo Ukrainë.

Duke folur mbi vendimin, komisioneri i BE-së për Fqinjësi dhe Zgjerim, Oliver Varhelyi, tha se “derisa luftojmë pandeminë së bashku, partnerët tanë po ashtu janë një pjesë integrale e hapjes së sigurt së bashku”.

Eurokomisari Varhelyi përshëndeti përfshirjen e Maqedonisë së Veriut, Turqisë dhe Ukrainës në sistemin e ‘Certifikatës Dixhitale COVID’ të bllokut evropian.

Maqedonia e Veriut, nga ana e saj, përshëndeti vendimin e Komisionit Evropian, duke theksuar se në këtë mënyrë qytetarët e këtij vendi do t’i shmangin kufizimet e udhëtimit si testimet shtesë ose karantina e detyruar.

Ky vendim i Komisionit Evropian është njohje për Maqedoninë e Veriut për hapat aktive të ndërmarrë nga ana jonë në kontekst të ndërveprimit me rregullat e BE-së në këtë drejtim. Kjo do të thotë konfirmim për autenticitetin, vlefshmërinë dhe integritetin e vendimeve, hapave dhe masave që ndërmerren nga institucionet tona kur bëhet fjalë për mbrojtjen e shëndetit të qytetarëve tanë”, tha në një njoftim Ministria e Punëve të Jashtme e Maqedonisë së Veriut.

– Funksionimi i ‘Certifikatës Dixhitale COVID’

Dokumenti është i disponueshëm në telefonat e mençur ose në format letre dhe përmban një kod ‘QR’ që lejon autoritetet të përcaktojnë statusin e virusit COVID-19 të udhëtarit.

Ky dokument tregon nëse një person ka marrë të dy dozat e rekomanduara të vaksinës COVID-19 të miratuar nga Agjencia Evropiane e Mjekësisë (EMA), nëse posedon test negativ ‘PCR’ brenda 72 orëve të fundit ose nëse është shëruar nga virusi në gjashtë muajt e fundit.

Vaksinat e autorizuara nga EMA janë produktet e kompanive farmaceutike Pfizer/BiNTech, Moderna, AstraZeneca, CureVac dhe Johson & Johnson.

Persona që nuk janë të vaksinuar dhe nuk kanë dokument se janë shëruar nga virusi do të duhet të bëjnë një test ‘PCR’, ndërsa ata që janë vaksinuar me vaksinën e kompanisë kineze SinoVac, që nuk përfshihet në vaksinat e rekomanduara nga EMA, do të duhet të kontrollojnë kërkesat e hyrjes në vendin ku duan të udhëtojnë.