Maqedoni, AKE shpall tender për të miratuar përdorimin e 5G

Agjencia për Komunikime Elektronike (AKE) ka shpallur tender për dhënien e miratimeve për shfrytëzimin e radio frekuencave për gjeneratën e pestë mobile 5G. Afati për dorëzimin e ofertave është 35 ditë, ndërsa hapja publike e ofertave është caktuar për më 5 janar në ora 10:00.

Vendimi për përzgjedhjen e ofertuesve të cilët do të marrin pjesë në procedurën e ankandit publik do të sillet në afat prej shtatë ditëve nga dita e hapjes publike të ofertave.

Të drejtë për pjesëmarrje në tenderin publik kanë personat fizik ose juridik, vendas dhe të huaj. Mes tjerash, ofertuesi duhet të japë deklaratë me shkrim se do të fillojë përdorimin e radio frekuencave të përcaktuara në miratimet për përdorimin e radiofrekuencave brenda nëntë muajve nga data e vlefshmërisë së miratimit.

“Miratimet për përdorimin e radiofrekuencave nga vendimi i AKE, A1, A2, A3, B1, B2 dhe B3 jepen për një periudhë 15-vjeçare, kurse miratimet B41, B44, B45 dhe B46 për një periudhë 6-vjeçare, e vlefshme nga dita e lëshimit të miratimit dhe me të drejtën e vazhdimit të vlefshmërisë së miratimit në mënyrën e përcaktuar në Ligjin për Komunikimet Elektronike”, thonë mes tjerash nga AKE.

Kërkesa për interes për pjesëmarrje në tenderin për dhënien e miratimeve për shfrytëzimin e radio frekuencave për 5G, pas shpalljes së AEK-ut më 1 qershor të këtij viti kanë dorëzuar kompanitë Neotel, Bitstream Mobile, Telekomi i Maqedonisë dhe A1 Maqedoni.