Ministri i Mbrojtjes i Turqisë, i cili qëndron për vizitë në Prishtinë, është pritur në takim në Prishtinë nga kryeministri i Kosovës, Albin Kurti, transmeton Anadolu Agency (AA).
Siç njofton kryeministria, mbështetja dhe përkrahja e Turqisë ndaj Kosovës, si dhe marrëdhëniet e mira bilaterale ndërmjet të dy vendeve u vlerësuan lartë në takimin e kryeministrit Kurti me ministrin Akar, ku ishte i pranishëm edhe ministri i Mbrojtjes i Kosovës, Armend Mehaj.
“Turqia është një përkrahëse, mike dhe partnere e madhe e Kosovës. Vendet dhe njerëzit tanë kanë lidhje të afërta tradicionalisht dhe qeveritë tona kanë bashkëpunuar ngushtë që nga pavarësia jonë”, tha Kurti, duke theksuar rolin e rëndësishëm që Turqia ka luajtur në çlirimin e Kosovës, por edhe në forcat paqe ruajtëse të NATO-s.
Më tej, thuhet se kryeministri Kurti falënderoi Turqinë dhe presidentin turk, Recep Tayyip Erdogan, për kontributin e madh në afirmimin e pavarësisë së Kosovës dhe për mbështetjen në procesin e njohjeve.
Duke theksuar se Kosova ka shumë për të mësuar nga Turqia dhe Forcat e Armatosura Turke, Kurti shprehu mirënjohjen për programet dhe stërvitjet e shkëlqyera që ofrojnë shumë mundësi për shtim aftësish për pjesëtarët e Forcave të Sigurisë së Kosovës (FSK).
Ai u shpreh veçanërisht mirënjohës për “donacionet në fondet e mbrojtjes, prej 1.3 milion dollarë për vitin 2021, si dhe pajisjet, trajnimet dhe arsimimin në të gjitha fushat”.
“Si qeveri e Kosovës, ne jemi vërtet mirënjohës për mbështetjen kaq bujare të Qeverisë së Turqisë dhe shpresojmë se do të vazhdojmë të punojmë për të çuar më tej bashkëpunimin tonë në këtë aspekt”, tha Kurti.
Duke përmendur sukseset e Forcës së Sigurisë, Kurti bëri të ditur se për vitin e ardhshëm qeveria ka ndarë një buxhet prej mbi 100 milionë euro për Ministrinë e Mbrojtjes apo 1,3 për qind të Bruto Produktit Vendor, duke synuar që së afërmi të arrihet edhe standardi prej 2 për qind të Bruto Produktit Vendor, që parasheh një ushtri e NATO-s.
Akar, nga ana e tij, theksoi përpjekjet e mëdha të Turqisë, që Kosova të fitojë vendin e duhur në arenën ndërkombëtare. Ai rikonfirmoi mbështetjen e vazhdueshme për integrimin euro-atlantik dhe në NATO, rritjen e vazhdueshme të kapaciteteve të FSK-së, si dhe zhvillimin ekonomik të Kosovës.
“Vlerësoj marrëdhëniet ndërmjet dy vendeve dhe dy popujve tonë që bazohen në një lidhje shumë të afërt, të cilën do ta çojmë edhe më përpara”, tha ministri Akar.
Akar gjatë vizitës në Prishtinë u prit me ceremoni më të larta shtetërore nga homologu i tij kosovar, ministri Mehaj, si dhe në një takim tjetër nga presidentja Vjosa Osmani.
