“Danas”: SHBA-ja e impresionuar me Kurtin, e shokuar me Vuçiqin

Administrata amerikane e udhëhequr nga presidenti Joe Biden, gjatë vazhdimit të negociatave mes Kosovës e Serbisë, do të ushtrojë më shumë presion ndaj presidentit serb Aleksandër Vuçiq, se sa ndaj kryeministrit të Kosovës Albin Kurti, në mënyrë që të arrihet një zgjidhje kompromisi.

– Advertisements –

Gazeta ditore ndër të vetmet të pavarura në Serbi, Danas raporton sot se një përfaqësues jozyrtar i qarqeve diplomatike nga Washingtoni i ka konfirmuar kësaj gazete se ‘në Washinton janë të impresionuar nga demokracia e Kurtit, ndërsa në anën tjetër janë të shokuar nga autoritarizimi i Vuçiqit.

Siç mëson Danas presidenti i Serbisë ka marrë kritika nga Departamenti Amerikan ndër të tjera, për “mungesën e sensit për dialog me kundërshtarët politikë, kontrollin e tepruar mbi media”, si dhe “deklaratat ndezëse të bëra shpesh nga ai dhe disa të bashkëpunëtorë të tij për fqinjët e Serbisë në Ballkanin Perëndimor “.

Sa i përket Kurtit, pretendohet se ai “gëzon mbështetjen e Amerikës në shumicën e segmenteve politike”, megjithëse konsiderohet një “bashkëbisedues më i pakëndshëm” i Amerikës sesa paraardhësi i tij në detyrë, Avdullah Hoti.

Në atë kontekst, theksohet se “Kurti dëshiron atë që përfaqëson administrata e Biden – që Kosova të marrë njohje nga Serbia”.

Burimi i gazetës Danas shpjegon se Amerika pret që Kurti të zbatojë reformat e premtuara, “veçanërisht ato që lidhen me sundimin e ligjit, përfshirë luftën kundër korrupsionit”, dhe të “llogarisë seriozisht” te Presidentja e Kosovës Vjosa Osmani, e cila “ka lidhje politike në qarqet afër Biden”.

Sipas Danas Departamenti i Shtetit Amerikan ende jo zyrtarisht pretendon se Mattheë Palmer nuk do të qëndrojë për një kohë të gjatë në pozicionin e Zëvendës Ndihmës Sekretarit të Shtetit në të ashtuquajturën “Byroja Evropiane”, që do të thotë se ai do të lirohet nga detyrat e tij si Përfaqësues Special për Ballkanin Perëndimor.

Siç shpjegon ky burim për Danas “Karen Donfried, e cila do të emërohet Ndihmëse Sekretare e Shtetit e SHBA-së për Evropën dhe Euroazinë, e cila me siguri do të zgjedh një ekip të ri, duke përfshirë një përfaqësues të veçantë për Ballkanin Perëndimor”.