Dejan Pantiq, ish-polic i Kosovës, është arrestuar të shtunën, nën dyshimin se ka organizuar sulmin ndaj zyrave të Komisioneve Komunale Zgjedhore në veri të Kosovës, ka njoftuar ministri i Punëve të Brendshme, Xhelal Sveçla.
Në një shkrim në Facebook, Sveçla ka thënë se Pantiq në të kaluarën ka qenë pjesëtar i MUP-it serb.
“I ndaluari sipas dëshmive të Policisë së Kosovës ka organizuar sulmin terrorist në zyret e KKZ-së në veri të vendit me ç’rast ishin sulmuar zyrtarët e KQZ-së dhe zyrtarët policor. Pantiq akuzohet për kryerjen e veprave terroriste dhe sulm kundër rendit kushtetues. Grupe ekstremiste me qëllim të parandalimit të vendosjes së drejtësisë janë organizuar në bllokim të disa rrugëve dhe ngritje të barrikadave në Leposaviç, Zveçan dhe Zubin Potok”, ka shkruar Sveçla në Facebook.
Sveçla ka ftuar qytetarët që të ruajnë qetësinë, ndërsa ka përfunduar se “asgjë nuk mund t’i ndalë institucionet e Republikës së Kosovës për ofrim të sigurisë për qytetarët pa dallim e për sjellje para drejtësisë të të gjithë shkelësve të ligjit”.
Pas arrestimit të Pantiqit, serbët lokalë kanë bllokuar rrugën në Rudar.
Të martën në Zubin-Potok dhe në Mitrovicë të Veriut, zyrtarët komunalë të zgjedhjeve dhe zyrtarët policorë, derisa kanë tentuar t’i hapin zyrat e Komisioneve Komunale Zgjedhore, janë sulmuar me shok-bomba dhe të shtëna në ajër, nga persona të panjohur. Si pasojë e kësaj atyre u është pamundësuar vazhdimi i procesit përgatitor për zgjedhjet e jashtëzakonshme në veri. Sulme në veri ka pasur edhe të mërkurën.
Një polic u plagos të enjten nga një sulm me armë të gjata në Zveçan, në ditën kur u njoftua se Policia ka shtuar praninë në veri.
Pas ngritjes së tensioneve në veri, në prag të zgjedhjeve për kryetarë të komunave, presidentja Vjosa Osmani ka njoftuar të shtunën se zgjedhjet janë shtyrë për në prill.
Muajin e shkuar serbët vendosën t’i bojkotojnë institucionet e Kosovës pasi Qeveria vendosi t’i ndëshkojë pronarët e veturave me targa ilegale, të lëshuara nga Serbia. Në mesin e të dorëhequrve pati qindra policë.
